БИШКЕК, 7-авг. — Sputnik. Американын Gallup International уюму тарабынан түзүлгөн жарандардын коопсуздугу боюнча рейтингде Кыргызстан 74 балл алды.
Рейтинг түзүү үчүн америкалык уюм 135тен ашык өлкөнүн 136 миңге чукул тургундарынан сурамжылоо жүргүзгөн. Анда ар кайсы мамлекеттин жарандарына алар жашаган аймакта кылмыштуулулуктун көрсөткүчү жана жергиликтүү тартип сакчыларынын иштөө деңгээли тууралуу суроолор берилген.
Коңшу Казакстан — 79, Тажикстан — 86 баллга ээ болсо, Өзбекстан өлкөсү 95 балл алып, дүйнөлүк рейтингде экинчи орунду багынткан.
Мындан улам Кыргызстан Россия жана Сенегал өлкөлөрү менен бир катарга илинген.
Өзбекстан жана Тажикстан өлкөлөрү жарандарынын коопсуздугун коргоо жагынан алдыңкы мамлекеттердин катарына кирген. Рейтингдин биринчи сабын Сингапур ээлеп, 97 балл алган. Ал эми тизменин соңуна Сальвадор (54 балл), Либерия (53), Венесуэла (42) балл менен илинишкен.
