Пермдик тележурналист Роман Четин кесиптешин бетке муштап жиберген Александр Орловду дуэлге чакырды. Бул туурасында ал НТВ каналынын түз эфиринде билдиргенин РИА Новости жазды.
Окуя 2-август күнү Аба-десант күчтөрүнүн майрамы учурунда болгон. Даталуу күнүн белгилөө тууралуу репортаж жасап жатканда журналист жабыркаган. Тагыраагы, Москвадагы Горький атындагы сейил бакта мас киши НТВ каналынын "Өзгөчө кырдаал" программасынын учурунда сүйлөп жаткан журналист Никита Развозжаевди бетке бир койгон.
Орловго карата кылмыш иши козголуп, бир нече күнгө камакка алынган.
Маалыматта анын Аба-десант күчтөрүнө эч кандай тиешеси жок экени аныкталганы айтылды.
"Социалдык тармак аркылуу ал кишиге кайсы учур болбосун бетме-бет чыгууга чакырык жасадым. Бирок беттеш эл алдында болбошу керек. Кайсы шаарга кел десе да барууга даярмын", — деген журналист РИА Новости агенттигине.
Ал дуэлге чакырган кишиден жооп болбой жатканын, бул тергөө иштеринен улам болушу мүмкүн деп болжолдоп, кайсы күн десе да макул экендигин кошумчалаган.
