БИШКЕК, 2-авг. — Sputnik. "Мамлекеттик ипотекалык компания" (МИК) АККсы ар бир облустун борборуна эконом-класстагы көп батирлүү турак жайларды курганы жаткандыгын аталган компаниянын маалымат кызматынан билдиришти.
Мындай кадамдын негизги максаты — жарандарды үй менен камсыздоо жана компаниянын турак жай фондусун түптөө.
Маалыматка караганда, учурда жер-жерлерде курулуш иштерин баштоо үчүн курулуш компаниялары менен сүйлөшүүлөр жүргүзүлүп, тиешелүү документтер даярдалып жатат.
"Ар бир облустун борборунда курула турган беш кабаттуу турак жайлар 60 батирлүү болот. Алардын 30у эки бөлмөлүү, 30у бир бөлмөлүү болмокчу. Үйлөрдү курууда ар бир курулуш материалынын сапатына өзгөчө көңүл бурулат. Аймактардын тоолуу жана дагы башка географиялык жагдайларын эске алуу менен сейсмикалык туруктуу имараттарды салууга басым жасалат", — деп айтылат билдирүүдө.
Ошондой эле МИК 2020-жылдын аягына чейин 130 миң чарчы метр турак жай курууну пландаштырып жатканы айтылды.
