БИШКЕК, 1-авг. — Sputnik. Түндүк Ирландияда 13 бир туугандын жашын кошкондо 1073 жылды түзгөн. Алар узак жашоонун сырын ачканын РИА Новости Daily Mail басылмасына шилтеме кылып жазып чыкты.
Донеллилердин үй-бүлөсү быйыл Гиннестер китебинин рекордуна кирген. Бүлөнүн эң улуусу 93, кичүүсү 72 жашта. Алардын айтымында, ар дайым атасынын "уйку алдында жылуу бир нерсе жеш керек" деген адатын бекем карманышкан.
"Кечки саат 22:00дө жана эртең менен 07:00дө сулу, сүт жана бир аз алмадан кыям колдонобуз", — деп билдирди үйдүн кичүү уулу Джо.
Басылма белгилеп кеткендей, сулудан жасалган ботко кан басымды түшүрүп, холестериндин деңгээлин азайтып, жүрөктүн иштешин жакшыртат. Ошондой эле кант диабетин алдын алат.
Үй-бүлө мүчөлөрү кошумчалап кеткендей, алар өмүр бою өздөрү өстүргөн мөмө-жемиш, жумуртканы пайдаланышкан.
"Апабыз короого чыгып, бир тоокту союп кечки тамак жасап берчү", — деп баштан өткөн окуялары менен бөлүшүшкөн.
Ошондой эле алар колдун нанын жеп келишет жана ичимдикти чанда колдонушат.
