БИШКЕК, 31-июл. — Sputnik. Кыргызстанда өндүрүлгөн сүт азыктары Евразия экономикалык бирикмесинин (ЕАЭБ) рыногунда жогору бааланууда. Бул тууралуу Ветеринария жана фитосанитария боюнча мамлекеттик инспекциясынын директорунун кеңешчиси Төлөнбек Ырсалиев Sputnik Кыргызстан агенттигинин мультимедиалык борборунда өткөн жыйында билдирди.
12-август күнү өлкөдө ар кайсы азыктардын сапатын жогорулатууну талап кылган ЕАЭБдин 18 регламенти күчүнө кирет.
Ал эми Экономика министрлигинин техникалык көзөмөл жана метрология башкармалыгынын жетекчиси Султан Ахматовдун маалыматына караганда, Кыргызстан ЕАЭБ мамлекеттеринин рыногунда көбүрөөк соода кыла баштады.
"Экспорттун саны өсүп жатат. Демек биздин азык-түлүктөр өнөктөштөрдүн базарларына кетүүдө. Мунун өзү Кыргызстан талапка жооп берген продукция даярдай баштады дегенди билдирет. Жылыш катары бааласак болот", — деди Ахматов.
Кошумчалай кетсек, ЕАЭБ рыногуна өз продукциясын киргизүүгө уруксат алган ишканалардын саны 28ге жетти. Былтыр ушул убакта алардын саны 16 гана болчу.
Жакынкы арада бул тизмени дагы сегиз компания толуктаары күтүлүүдө.
