БИШКЕК, 29-июл. — Sputnik. Ушул жылдын 30-31-август күндөрү улуттук филармонияда кыргыз жана казак төкмө акындарынын XI эл аралык айтышы өтө турганын "Айтыш" коомдук фондусу билдирди.
Маалыматка ылайык, иш-чара белгилүү акын, Кыргыз эл артисти Тууганбай Абдиевдин 80 жылдык мааракесинин урматына карата уюштурулууда.
Уюштуруучулардын айтымында, айтыш Маданият, маалымат жана туризм министрлиги менен Тууганбай Абдиев атындагы коомдук фондунун колдоосу менен өтмөкчү.
Белгилүү төкмө, дастанчы, комузчу Тууганбай Абдиев 1937-жылы Токтогул районундагы Ичке-Сай айылында жарыкка келген. Устаты Коргоолдон комуздун коштоосунда ырдоону, айтыштын ар кыл түрлөрүн, Сарыкунандан дастанчылыкты үйрөнгөн. "Курманбек", "Жаныш-Байыш", "Ак Мөөр" дастандарын айткан.
Азыркынын көзгө басар акындары Элмирбек Иманалиев, Амантай Кутманалиев, Жеңишбек Токтобеков, Шекербек Адыловдорду таптаган.
