Кыргыз бийчилери Түркияда өткөн сынакта 3-орунду ээледи

БИШКЕК, 26-июл. — Sputnik. Кыргызстандык бийчилер Түркияда өткөн "Altyn Mobilye" маданият жана искусство эл аралык фестивалында 3-орунга ээ болду. Бул туурасында Sputnik Кыргызстан агенттигине "Таажы" бий тобунун жетекчиси Мээрим Табалдиева маалымдады.

Анын айтымында, фестивалга жалпы жонунан 21 өлкө катышкан.

"Кыргызстандын атынан "Агат" жана "Таажы" бий топтору барганбыз. Түркиянын Бурса жана Инегөл шаарларында эки сынакка катыштык. Тилекке каршы биринчисинен байгелүү орунга жетпей калдык. Экинчиси Инегөл шаарында өтүп улуттук бийдин төрт түрүн тартуулаганбыз. Калыстардын купулуна толуп үчүнчү орунду ыйгарышты", — деди Табалдиева.

Ал эми күмүш байгеге Адыгея республикасы, алтынга Македониядан барган бийчилер ээ болгон.

"Үчүнчү орун Кыргызстан дегенде түшүнбөй, бир чети ишенбей отура бериптирбиз. Экинчи, үчүнчү орундарды айтып жатканда анан түшүнүп сахнага чыктык. Ага чейин чет өлкөлүктөр менен достошуп алгандыктан бизди сыйлыкка чакырганда грузиялыктар, татарстандыктар сүрөнгө алып, казакстандыктар болсо желегибизди көтөрүп "Кыргызстан" деп кыйырып сүйүнүп жатышты. Ушинтип колдоп турса аябай жагымдуу болот экен", — деп кубанат топтун жетекчиси.

Ошондой эле ал, байгеге атайын статуэткадан сырткары 1000 доллар акчалай сыйлык берилгенин кошумчалады. Ал эми жолго кеткен чыгымдарын өздөрү төлөп барса, калганын уюштуруучу тарап мойнуна алган.

"Таажы" тобу үстүбүздөгү жылдын март айында дагы Казакстанда өткөн сынакка катышып "Жогорку деңгээлде аткарылган чеберчилик" номинациясына ээ болушкан.