БИШКЕК, 11-июл. — Sputnik. Жогорку Нарын каскадына ГЭСтерди Чехиянын Liglass Trading CZ, SRO компаниясы кура турганы белгилүү болуп, өлкө башчысы Алмазбек Атамбаевдин катышуусунда КР өкмөтү аталган компания менен келишимге кол койду.
Ага ылайык, Liglass Trading CZ, SRO компаниясы Ак-Булуң ГЭСи менен Нарын-1 ГЭСин куруп, ошондой эле "Кыргызстанда чакан гидроэлектростанцияларын куруу" долбоорун ишке ашырышы керек.
Sputnik агенттиги аталган компания тууралуу кызыктуу фактыларды окурмандарга сунуштайт.
Акыркы жылдары Liglass Trading инвестиция салуу жана Европада ГЭСтерди куруу боюнча ишмердигин арттырып келет.
2017-жылдын июнь айынын аягында Кыргызстандын аймагында чакан 10 ГЭСти куруу боюнча тендерди утуп алган.
Чехия тарап Кыргызстанда энергетикалык долбоорлорду ишке ашырууга кызыктар экенин өлкө президенти Милош Земан Астанада Алмазбек Атамбаев менен эки тараптуу жолугушууда билдирген.
Келишимге ылайык, чех компаниясы Кыргызстандын "РусГидро" компаниясына болгон 37 миллион долларлык карызын төлөөнү өз мойнуна алган.
