БИШКЕК, 20-июл. — Sputnik. Баткенде мурдагы аялы менен чырдаша кетип башын таш менен жанчып өлтүргөн жаран 20 жылга эркинен ажыратылды. Бул тууралуу Баткен облустук сотунун маалымат катчысы Аскар Баймуратов билдирди.
Анын айтымында, соттолуучу жаран мурдагы аялын ээн талаада өлтүрүп из жашырып кеткен.
"Соттолуучу жаран 34 жашта. Ал 2011-жылы Чек айылында 1989-жылы туулган кызга үйлөнүп үч балалуу болгон. Бирок алар 2015-жылы 12-сентябрда ажырашып кетишкен. Үстүбүздөгү жылдын 5-февралында экөө кайра жолугуп автоунаа менен Бужум айылындагы ээн таалага барган. Алар сүйлөшүп отурганда өз ара пикир келишпестик чыгып, жолдошу аялын муштуму менен уруп жиберген", — деп айтылат билдирүүдө.
Баткен райондук Ички иштер бөлүмүнүн кызматкерлери оперативдүү издөө ишин жүргүзүп, 6-февралда шектүүнү кармашкан. Ал эми сот кылмышка шектүүнү күнөөлү деп таап 20 жылга эркинен ажыратты.
