БИШКЕК, 17-июл. — Sputnik. Учурдагы өкмөт башчы Сооронбай Жээнбековдун ордуна биринчи вице-премьер Мухамметкалый Абулгазиев барышы мүмкүн. Мындай пикирин саясий серепчи Алмаз Акматалиев Sputnik Кыргызстан радиосуна маек куруп жатып билдирди.
Эске сала кетсек, КСДП партиясы президенттикке премьер-министр Сооронбай Жээнбековдун талапкерлигин көрсөткөн.
"Менин оюмча премьер-министр ашып кетсе 1,5 айга гана кызматын тапшырат. Буга байланыштуу жаңы өкмөт башчы деле келбейт. Биринчи вице-премьер Мухамметкалый Абулгазиев анын милдетин аткарып турат", — деди эксперт.
Акматалиев өкмөттүн курамында алмашуу болбойт деген оюн кошумчалады.
"Азыр эми премьер-министрдин президенттикке талапкерлиги съездден колдоо тапты. Анан кызматты тапшырабы же убактылуу токтотобу өкмөт башчынын укугу. Бул тууралуу Фарид Ниязов дагы билдирген. Эгерде кызматын убактылуу тапшырса анда милдетин биринчи вице-премьер аткарышы керек", — деди Абулгазиев.
Ал ошондой эле жогорудагы тартип мыйзамда көрсөтүлгөнүн, алдыда ушундай жагдай болсо мыйзамдын тартиби менен чечилээрин кошумчалады.
