Дем алыш күндөрү баңгизат сатууга тиешелүү төрт фактынын бети ачылды

БИШКЕК, 17-июл. — Sputnik. Милиция кызматкерлери дем алыш күндөрү маңзатты жайылтууга тиешелүү төрт фактынын бетин ачты. Бул тууралуу Ички иштер министрлигинин маалымат кызматы билдирди.

Ага ылайык, Ак-Суу районунун Боз-Учук айылында 40 жаштагы жергиликтүү тургун кармалган. Аталган киши баңгизатын сатууга аралашкан деген ыкчам маалымат келип түшкөн.

"Киши көчөдөн кармалып, тинтүү учурунда жанынан 200 грамм кара куурай табылган", — деп айтылат маалыматта.

Ушундай эле окуя Талас облусунун Бакай-Ата районунда катталган. Ал жакта талаада келе жаткан жаран милицияны көргөндө качууга аракет кылган. Ал колуна баштык көтөрүп алган. Тинтүү учурунда 215 грамм кара куурай табылган. Аны ал өзү үчүн даярдаганын айткан. Кармалган 37 жаштагы жарандын буга чейин соттолгону аныкталган.

Дагы бир окуя Бишкек шаарында катталган. 58 жаштагы тургун кармалып, жанынан 137 грамм гашиш табылган.

Ал эми Нарын облусунун Жумгал районунда Honda Odyssey автоунаасынан 400 грамм кара куурай алынган. Машинанын ичиндеги эки жаран милиция тарабынан кармалган.

Ошентип дем алыш күндөрү жүргөн атайын иш-чаранын жыйынтыгында жалпысынан 952 грамм баңгизаты алынган.

Жогорудагы бардык фактылар боюнча кылмыш иши козголуп, тергөө амалдары жүрүүдө.