БИШКЕК, 30-июн. — Sputnik. Үстүбүздөгү жылдын август айында Кыргызстан боюнча 211 санариптик автоматтык телевизиондук ретрансляторлорду орнотуу иштери аяктайт. Бул тууралуу өкмөттүн маалымат кызматы билдирди.
Ага ылайык, учурда радио байланыш жетпеген 326 айыл аймакты санариптик телерадиоберүү менен камсыз кылуу үчүн ретрансляторлорду орнотуу иштери жүрүп жатат.
"Бүгүнкү күндө жалпы республика боюнча керектелген 211 санариптик автоматтык телевизиондук ретранслятордун 67си орнотулду. Август айында бардык орнотуу иштери аягына чыгат. Калган 99 айылдын калкы санариптик телерадиоберүүнү спутник аркылуу көрө алышат", — деп айтылат маалыматта.
Эскерте кетсек, "Женева-06" планы 101 өлкө тарабынан кабыл алынган. Анын курамында Кыргызстан дагы болгондуктан санариптик телерадиоберүүгө милдеттүү түрдө өтүүсү каралган.
Кыргызстан 2017-жылдын 15-майынын баштап санариптик телерадиоберүүгө өткөн.
СТБ тууралуу бардык суроого жоопторду Sputnik Кыргызстан материалынан окуңуздар>>
