Нарындагы XI кылымга таандык курулушту казууга түркиялык адистер жардамдашат

БИШКЕК, 28-июн. — Sputnik. Нарын облусунун Кочкор районунда XI кылымга таандык жер алдындагы тарыхый курулушта археологиялык иштер башталды. Бул тууралуу археолог, тарыхчы Кубат Табалдиев Sputnik Кыргызстан агенттигине билдирди.

Азыркы маалда казуу иштерине Ош мамлекеттик университети менен Кыргыз-түрк "Манас" университетинин студенттери жана мугалимдери катышууда.

Табалдиевдин айтымында, Кочкор районунун Кош-Дөбө айылына Ош менен Бишкектен 28 адам келип, казуу иштерин аткарып жатат.

"Мындай жер алдындагы уникалдуу археологиялык курулуш Кыргызстанда биринчи жолу казылып жатат. Менимче XI кылымдагы Караханид мезгилине таандык диний объект же атактуу адамдын күмбөзү болушу мүмкүн. Анткени мындай бышкан кыштан курулган архитектура Орто Азия чөлкөмүндө кездешип келет. Азыр чопо идиштин, жаргылчактын сыныктары, декоративтүү шыбактары чыгып жатат. Бирок бул узак убакытка созулган иш болот, себеби жумуштун көлөмү абдан ири, — деди археолог.

Ал ошондой эле жергиликтүү тургундар буга чейин атайын техника менен алтын табуу максатында курулуштун кээ бир бөлүгүн бузуп салгандыгын кошумчалады.

Казуу иштерин түркиялык уюм каржылоодо. Жакынкы мезгилде ыктыярчылар менен археологдорго түрк адистери жардамдашууга келет.