БИШКЕК, 22-июн. — Sputnik. BMW үлгүсүндөгү унаа менен коляска сүйрөп бара жаткан келинди жөө адамдар өтүүчү чийинден сүзүп кете жаздаган айдоочу кармалды. Бул тууралуу Бишкек ШИИБ Кайгуул милициясынын маалымат кызматы кабарлады.
Күбөлөрдүн айтымында, окуя 20-июнь күнү саат 9.10до Жибек-Жолу проспектисиндеги Батыш автобекетинин жанынан болгон.
Унаанын видео көзөмөлүндө көрүнүп тургандай, коляска сүйрөгөн келин жөө адамдар өтүүчү чийинден өтүп бара жаткан. Ага бардык айдоочулар жол берип жатканына карабай, катуу келе жаткан BMW үлгүсүндөгү унаа айдап өтүп кеткен.
Мындан улам ага административдик кодекстин 235-беренесинин 1- "Транспорт каражатынын айдоочусу тарабынан жол белгилерин же жолдун өтүүчү бөлүгүндөгү чек белгинин талаптарын сактабагандык, озуп өтүүнүн жана маневр жасоонун, транспорт каражаттарын жолдун унаа жүрө турган бөлүгүнө жайгаштыруунун эрежелерин, жолдордун кесилишинен өтүү, жөө киши өтүүчү жерден өтүү, жолдун четинде, тротуарларда, жөө жүргүнчүлөргө арналган жолдордо жана башка газондордо жүрүүнүн эрежелерин бузушу" бөлүмүнө ылайык протокол түзүлдү.
Мындай эреже бузгандыгы үчүн 1000 сом айып пул төлөнөт.
