Ысык-Көл облусундагы "Хан-Теңир" жаратылыш коругуна 5000 сомдон беш миң метрге чыккан альпинисттер гана төлөйт. Бул тууралуу Sputnik Кыргызстан агенттигине өкмөттүн Монополияга каршы жөнгө салуу мамлекеттик агенттигинин Ысык-Көл облусундагы бөлүм башчысы Фархад Чегебаев билдирди.
Анын айтымында, мамлекеттик жаратылыш коругуна эс алып келгендер үчүн баа жеңил унаалардан 100 сом, ал эми жүк ташуучу унаалардан 450 сом гана алынат.
"Беш миң метрден ашкан чокуга көпчүлүгү альпинисттер эле чыгат. Алар жок дегенде эле бир жумадан ашык жүрөт экен. Бул бааны биз деле ойдон чыгарган жокпуз. Мамлекеттик парк кызматкерлери эсептеп туруп беришти. Мисалы, бир-эки жумага чыккан альпинист чатырын тигип, таштанды таштайт. Анын баарын чыгып ал жактын кызматкерлери тазалашы керек", — деди Чегебаев.
Белгилей кетсек, Хан-Теңир чокусу Кыргызстан, Казакстан жана Кытай өлкөлөрүнүн чек арасында жайгашкан. Бийиктиги 7010 метрди түзөт.
