БИШКЕК, 13-июн. — Sputnik. Чаткал районундагы Бугулуу-Төр жайлоосунан байыркы таш жазма эстеликтеринин топтому биринчи жолу сүрөткө тартылды. Бул тууралуу аталган таш эстеликтерди тарткан Чаткал районунун аңчылык мекемесинин башчысы Рыскулбек Таласбаев Sputnik Кыргызстан агенттигинин кабарчысына билдирди.
Саны жүзгө жеткен таш жазмаларда негизинен тоо текелер, бугулар жана аңчылар чагылдырылган.
Таш эстеликтер деңиз деңгээлинен 3770 метр бийиктиктеги Бугулуу-Төр жайлоосунда жайгашкан.
"Ташка чегилген сүрөттөрдүн көзгө араң көрүнүп тургандыгы эле алардын бир канча кылым мурда тартылганынан кабар берип тургандай. Таштардын саны жүздөй болгону менен ага тартылган сүрөттөрдүн саны көбүрөөк. Себеби айрым таштарда жалгыз гана сүрөт болсо айрымдарында беш-ондон сүрөт тартылган. Таңгалычтуусу айрым сүрөттөрдө куйруктуу же үч буттуу адамдардын элеси түшүрүлүптүр", — деди Таласбаев.
"Бул таштар тууралуу 15 жыл мурунку изилдөөлөрүбүздө эле жергиликтүү элден укканбыз. Маалыматтар менин илимий ишиме дагы кирген. Бирок ушул убакка чейин мүмкүнчүлүк болбогондуктан, биздин кызматкерлер жерине барып таанышып, сүрөткө тартып келе элек болчу", — деди Сулайманова.
Ар бир сүрөт ар кандай формадагы жана көлөмдөгү көгүш түстөгү катуу таштарга чегилген.
