39 жашка чыккан актер Азиз Мурадиллаев. "Курманжан датка" тасмасындагы саясий ишмер Алымбек датканын образын жаратуу менен калың элге таанылган актер Азиз Мурадиллаев кечээ 39 жашын белгиледи. Илдетке кабылып жакында эле сакайган актерге алгач эле ден-соолук тилейли. Ал эми сырдуу жана муңдуу көз карашка ээ актер тууралуу кызыктуу 7 фактыны бул жактан окуңуздар.
Ден-соолук демекчи, кабарчыбыз Гүлдана Талантбекова көбүнчө аялдар тушуккан стресс, депрессиянын себептерин териштирип, ал эмнеден келип чыгаары тууралуу кеп кылган. Стресске кабылбайын десеңиз бул материалды сөзсүз окуңуз.
Акчага байланган балдар. 12-июнь балдар эмгегинин эл аралык күнүн утурлай кабарчылар шаардык таштанды жайга барып, ал жакта жан багып, акча таап жүргөн өспүрүмдөрдүн тагдырына күбө болуп келди. Айрымдары окуудан чыгып ата-энесине жардамдашып иштөөгө мажбур болсо, кээ бири эптеп эле каражат чогултуунун айласын көргөндөр.
Ата-Бейиттин сырлары. Бул мемориалдык комплекстеги трагедиялуу тагдырлар жана анын ичиндеги комплекстер тууралуу Нургүл Максүтова кызыктуу материал жасады.
Адамдан амал качып кутулбайт. Милиция кызматкерлери тарабынан баңгизат жайылтуунун жолдору жок кылынып жатат. Ойго келбеген ыкма менен баңгизат ташыган кылмышкерлердин кылыгын көрүп оозуң ачылат. Бири героинди пиязга салса, кээси нашааны балга аралаштырып койгон.
Абайлачы айдоочу. Бишкек — Торугарт жолунда автокырсык болуп, андан жети киши жабыркаган. Кырсыктын себепкери BMW үлгүсүндөгү унаа айдаган 19 жаштагы бала болгон.
Театрга баралы. Республикалык театр фестивалы ачылды. Мындан улам 12-июндан 15-июнга чейин эч нерсеге карабай жан дүйнөнү эс алдырып, театрга барып кызыктуу спектаклдерге күбө болуп келиңиздер. Ал эми программасы бул жакта толук жазылган.
Бүгүн өлкөдө күн күркүрөп жаан жаайт.
Валюта наркы. Сомдун баасы долларга карата орто эсеп менен 68.34 (сатып алуу) жана 68.59 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү май 39.50 сом, АИ-95 үлгүсүндөгү бензин 42.00 сом, ал эми дизель майы 43.00 сомдон сатылууда.
Соңку сөз. Жакшы сөз жан эргитет. Андыктан жагымдуу сөз айтуудан тажабайлы.
Жалпыңыздарга жакшы күн каалап Таалайгүл Усенбаева
