БИШКЕК, 12-июн. — Sputnik. Премьер-министр Сооронбай Жээнбеков менен Бириккен Улуттар Уюмунун баш катчысы Антониу Гутерриш кечээ, 11-июнь күнү, Ош коогалаңында каза болгондорду эскеришти. Бул тууралуу өкмөттүн маалымат кызматы билдирди.
Алар 2010-жылдын июнь айындагы кайгылуу окуяларга байланыштуу арналган "Энелердин көз жашы" мемориалына гүл коюп, сүрөт көргөзмөнү көрүштү.
Өкмөт башчы эскерткендей, Антониу Гутерриш мурда БУУнун качкындар боюнча Жогорку комиссары болгон кезде Кыргызстанга эки жолу келип, 2010-жылы кайгылуу окуялардын кесепеттерине күбө болгон.
"Бүгүнкү күндө өлкө бийлиги улуттар аралык ынтымакты бекемдөөгө жана эл арасындагы биримдикти чыңдоо боюнча аракеттерди көрүп, акыркы жылдары өлкөдө этностор арасында туруктуу абал түзүлдү. Жылдан жылга ар кайсы улуттар ортосунда үй-бүлө кургандардын саны көбөйүүдө", — деди Жээнбеков.
Баш катчы Антониу Гутерриш ошол кездеги татаал учурда каза болгондордун жакындарына көңүл айтып, Кыргызстанда абал 2010-жылдан бери жакшы жагына өзгөргөндүгүн өзгөчө белгиледи.
"Азыр дүйнөдө көп улуттуулук, көп маданияттуулук адамзатынын жетишкендигине айланып бара жатат. Биз бул байлыкты сактап жана бекемдешибиз керек", — деди Гутерриш.
Андан кийин Жээнбековдун жана Гутерриштин жолугушуусу тар чөйрөдө уланды. Анда кызматташтык тууралуу маселелер, келечектеги пландар жөнүндө сөз болду.
