АСТАНА, 9-июн. — Sputnik. Индия менне Пакистан Шанхай кызматташтык уюмуна мүчө болушту. Тийиштүү документке ШКУ мамлекет башчылары Астанадагы саммитте кол коюшту.
ШКУга мүчө мамлекет башчыларынын саммити учурда Казакстандын борбору Астана шаарында өтүп жатат. Кыргызстандын атынан бул иш чарага президент Алмазбек Атамбаев катышууда.
Саммитте ошондой эле уюмдун кийинки өнүгүү маселелери, терроризмге каршы күрөшүү, Жакынкы Чыгыштагы жана Афганистандагы абал талкууланды.
Жыйындын соңунда бир катар документтерге кол коюлду. Анын ичинде экстремизмге каршы туруу жөнүндө конвенция, терроризмге каршы күрөшүү боюнча билдирүү да бар.
ШКУ эл аралык уюму 2001-жылы Кытай, Россия, Казакстан, Тажикстан, Кыргызстан жана Өзбекстандын башчылары тарабынан негизделген. 2017-жылы 9-июнда Астанада өткөн саммитте Индия менен Пакистандын уюмга мүчөлүккө кабыл алынды. Учурда ШКУга Афганистан, Белоруссия, Иран менен Монголия байкоочулук кылса, Азербайжан, Армения, Камбоджа, Непал, Түркия жана Шри-Ланка өнөктөш өлкө катары эсептелет.
