БИШКЕК, 9-июн. — Sputnik. Кыргызстан Шанхай кызматташтык уюмунун (ШКУ) банкы түзүлүп, анын кеңсеси Бишкекте жайгашуусун талап кылат. Бул тууралуу президент Алмазбек Атамбаев Астанада өтүп жаткан ШКУ саммитинде айтты.
Ушу тапта ШКУ жыйыны кеңейтилген чөйрөдө өтүп, ага уюмга мүчө мамлекеттерден тышкары Индия, Пакистан, Монголия президенттери менен Иран өкүлү жана БУУнун башкы катчысы Антониу Гутерриш катышууда.
Атамбаев өз сөзүндө Кыргызстан Индия менен Пакистандын уюмга мүчө болуп кирүүсүн колдой турганын айтып, бул кадам тарыхтын жаңы барактарын ача турганын баса белгиледи.
"Уюмдун кеңейиши жаңы саясий жана экономикалык мүмкүнчүлүктөрдү ачып, башкы планга жаңы шартка көнүшүү аракеттери чыгат", — деди өлкө башчы.
Президенттин айтымында, аймактагы коопсуздукту камсыздоо жана үч башкы коркунучка каршы туруу маселелери уюмдун негизги максаттары бойдон калат.
Өлкө башчы, мындан тышкары, ШКУ өлкөлөрүнүн чек аралары "тынчтык менен достуктун алкагы болуп, биз чек ара маселесин кызматташуу жолу менен чечүүбүз керек" экенин баса белгиледи.
"Кыргызстан ШКУну түптөгөндөрдүн бири, мындан улам биз үчүн ШКУ банкын түзүү башкы маселе бойдон калат. Банкты түзүү зарылдыгы бар, биз анын Бишкекте жайгашуусун талап кылабыз. Мында инфраструктуранын өнүгүшү маанилүү роль ойной турганын баса белгилеп кеткибиз келет. Инфраструктураны өнүктүрбөй туруп "Бир алкак — бир жол" долбоорунун алкагында каралган интеграциялык процесстерди алдыга жылдыруу мүмкүн эмес. Бул демилгелер ШКУнун 2025-жылга чейин өнүктүрүү стратегиясы жана БУУнун 2030-жылга чейин туруктуу өнүгүү жаатындагы күн тартиби менен үндөш. Муну менен бирге Кытай — Кыргызстан — Өзбекстан темир жол курулушунун жана туризм багытында кызматташуу боюнча планды ишке ашыруунун маанилүүлүгүн дагы бир ирет айткым келет", — деди Атамбаев.
ШКУ эл аралык уюму 2001-жылы Кытай, Россия, Казакстан, Тажикстан, Кыргызстан жана Өзбекстандын башчылары тарабынан негизделген. 2016-жылы июнда Өзбекстанда болгон саммитте Индия менен Пакистандын уюмга кирүүсү боюнча Меморандумга кол коюлган. Учурда ШКУга Афганистан, Белоруссия, Иран менен Монголия байкоочулук кылса, Азербайжан, Армения, Камбоджа, Непал, Түркия жана Шри-Ланка өнөктөш өлкө катары эсептелет.
