БИШКЕК, 3-июн. — Sputnik. АКШнын президенти Дональд Трамп Вьетнамдын премьер-министри Нгуен Суан Фук менен кол алышып жатып оңтойсуз абал жаратканын британиялык The Independent басылмасы жазды.
Узаган шаршемби күнү Вашингтондо Дональд Трамп менен Вьетнамдын премьер-министри жолугуп американын аскер кемесин Вьетнамдын аймагына киргизүү тууралуу талкуулашкан. Сүйлөшүүнүн соңунда Трамп премьер-министрдин колун катуу кыскандыктан ага бармак издери түшүп калган.
"Алыстан карап турган адамга дагы премьер-министрдин колунда калган издер көрүнүп турду", — деп жазылат маалыматта.
Вьетнамдын өкмөт башчысынын кубарып кеткен колдорун ВВС Вьетнам кызматы да байкап сүрөтүн чыгарган.
Трамп башкалар менен кол алышканда аларды өзүнө тартып, оңтойсуз абалда калтырып келгени менен белгилүү. Мурдараак Сауд Аравиянын Эр-Рияд шаарында "АКШ — Ислам дүйнөсү" саммитинин алкагында жолугушууда Тажикстандын президенти Эмомали Рахмондун катуу кол алышканын социалдык тармактын колдонуучулары күлкүгө алып, Трампка туруштук берген жалгыз лидер болду деп жазышкан.
