БИШКЕК, 3-июн. — Sputnik. Билим берүү жана илим министрлиги окуучуларды эл аралык олимпиадага жиберүүгө авиабилет сатып алуу үчүн тендер жарыялады.
Мамлекеттик сатып алуулар порталына жарыяланган маалыматка караганда, Бишкек — Бангкок — Бишкек каттамы боюнча алты билет алынат. Алдын ала маалыматтар боюнча Бишкектен учуп кетүү 5-июлга жана кайра өлкөгө кайтып келүү 15-июлга пландалып жатат.
Ошондой эле Бишкек — Жакарта — Бишкек каттамы боюнча дагы жети билет алынат. Окуучулар мугалимдери менен кошо болжол боюнча 15-июлда учуп кетип, 24 июлда кайтып келишет.
Министрлик авиабилеттерди сатып алуу үчүн 1 миллион 476 миң 600 сом сарптоого даяр.
Тендер 2-июнда жарыяланып, мөөнөтү 9-июнда аяктайт.
