БИШКЕК, 2-июн. — Sputnik. Учурдагы тариф колунда барларга гана пайдалуу. Мындай пикир Дүйнөлүк банктын Кыргызстандын экономикалык тармагына жасаган экономикалык анализинде айтылат.
Азыр колдонулуп жаткан тариф өнүгүүнү артка тартып, социалдык иштерге карама-каршы келет. Учурда мамлекет аз камсыз болгон жарандарга жардам берүүгө аракет кылууда. Электр энергиясын 700 киловатт-саатка чейин колдонгондор 77 тыйындан төлөсө, андан ашкандар үчүн ар бир киловаттына 2 сомдон эсептелет.
"Бул коюмдар электр энергиясын кадыресе колдонгондордун 80 пайыздан ашыгына тиешелүү. Ошентсе дагы жеңилдетилген тарифке муктаж эмес кардарлар менен ири өнөр-жайлар үчүн гана пайдасын берип жатат", — деп отчетте айтылат.
Дүйнөлүк банктын маалыматына ылайык, азыркы тариф чакан коммерциялык колдонуучулардын алдамчылыкка баруусуна өбөлгө болот. Алардын көбү катардагы колдонуучу катары катталып, электр энергиясы үчүн көп акча төлөөдөн качышат.
