"Бирөөнүн бутун бапса — кырсык болот", "Сумкаңды тетири көтөрсөң — эки аласың", "Сөөктүн чучугун жесең — ата-энеңе кайрымың жок болуп калат"… Мунун баары биз бала кезде катуу карманган ырым-жырымдар эле.
Кайсы бирин аткарбай калсак, боюбуз өспөй каларына же бүгүн эле "эки" аларыбызга терең ишенип, бушайман болчубуз. Азыр булардын баарын эстеп, балалык күндөрдүн баеолугуна бир жылмайып аласың.
Мындан улам Sputnik Кыргызстан агенттиги Балдарды коргоонун эл аралык күнүнө карата айрымдарыбыз ушул күнгө чейин карманып жүргөн ишенимдерди эске салды.
"А" тамгасына окшогон мамынын алдынан өтпө. Өтүп кете турган болсоң, боюң өспөй калат. Эгер досуң экөөң чогуу өтсөңөр, урушуп кетесиңер.
Бирөөнүн бутун баспа. Басып алсаң, кайра ага өзүңдүкүн тебелет. Антпесе үйдө кырсык болот.
Сөөктүн чучугун жебе. Чучук жесең ата-энеңдин чучугуна жеткире сөз айткан бала болосуң, кайрымың жок болуп калат.
Карга учуп баратканда жерге отур. Карга же башка канаттуулар учуп баратканда жерге отура калбасаң, мектептен "эки" аласың. Айрым региондордун балдары карга учуп баратканда боюбуз өспөй калбасын деп бир бутун көтөрүп туруп калышчу.
Кара мышык. Жолуңдан кара мышык өтүп кетсе баш кийимиңди тетири кийип же топчуңду кармап өтүп кет. Болбосо жолуң болбойт.
Сумкаңды тескери көтөрбө. Мектепке көтөргөн сумкаңды тетири көтөрүп алсаң, ошол күнү жаман баа аласың.
Баканын заарасы. Баканын заарасы тийип кетсе, ошол адамдын денеси чаарала болуп кетет. Ошондуктан аны дароо таштай муздак сууга жууп салыш керек.
