БИШКЕК, 29-май — Sputnik. Бүгүн түнү Бишкектин чок ортосунан эки унаа бет маңдай сүзүшкөнү тууралуу Sputnik Кыргызстан агенттигине күбө билдирди.
Жол кырсыгы саат 2.35тер чамасында Манас проспектиси менен Киев көчөлөрүнүн кесилишинде болгон.
Volkswagen Golf 4 үлгүсүндөгү унаа түштүктөн түндүктү көздөй келе жаткан. Ал эми каршы тилкеде келе жаткан Mercedes көчөлөрдүн кесилишинен солго бурган маалда унаалар сүзүшкөн.
"Алдын ала маалыматтарга караганда, кагышуудан Golf унаасынын айдоочусу жабыркады. Жерине келген Тез жардам кызматы анын акыреги сынганын айтып, ооруканага жеткиришти", — деп Кайгуул милициясынын маалымат кызматынан билдиришти.
Кырсык фактысы боюнча зарыл болгон экспертизалар дайындалды.
Эгер кандайдыр бир кызыктуу окуяларга туш болуп калсаңыз сүрөт, видеолорду биздин +996 706 566 544 WhatsApp номери аркылуу жөнөтүп кабарласаңыз болот.
