БИШКЕК, 28-май. — Sputnik. Баласынын операциясына акча чогултуп жаткан Жумабаевдердин үй-бүлөсүнө Америка менен Россиядагы мекендештер жардам берди. Бул тууралуу Sputnik Кыргызстан агенттигинин кабарчысына Айсулуу Жумабаева өзү билдирди.
Ошондон бери апасы Айсада базарда кайыр сурап, чогулган акчаны баланын гемодиализине төлөп турган. Алар ошол эле учурда Аргенге Түркияда операция жасатыш үчүн 11 миң доллар издешкен.
Жумабаеванын улуу кызы Айсулуунун айтымында акчаны чогултууга Америка, Россияда эмгектенген кыргызстандыктар жардамдашкан. Керек болуп жаткан акчанын бир бөлүгүн 2016-жылы жиберишкен, калганын ушул жылдын май айында алышкан. Аргенге апасы донор болот жана 11-июнда Түркияга учушат. Аларды аэропортто тез жардам кызматы тосуп алат.
"Апам менен Аргенди тез эле алып кетишет, мен операция бүткөнчө күтөм. Чынын айтсам, ал жактан каякка барууну билбейм. Балким мага котормочу болуп бергенге ыктыярчы табылып калса жакшы болмок, анткени Стамбулда өз алдымча бир нече күн жашашым керек", — деди Айсулуу.
Ал ошондой эле операцияга акча чогултууга жардам берген мекендештерге ыраазычылык билдирип, операциядан кийин Арген жарым жыл бою ай сайын 30 миң сомдун тегерегиндеги дарыны ичүүсү керектигин кошумчалады.
"Биз азырынча дарынын акчасын кантип табаарыбызды билбейм, Кудайдан жардам сурайбыз", —деди Айсулуу.
Операция жасалчу күн азырынча белгисиз.
