Буга байланыштуу Sputnik Кыргызстан агенттигинин кабарчысына муфтийдин орун басары Замир кары Ракыев орозо кармай турган адамдар жасоого болбой турган нерселерди айтып берди.
Дары ичип, ийне сайдырбайт. Эгер абалы оорлоп бара жатса ооз ачып ден-соолукту чыңдоо зарыл. Орозону кыйналып кармабаш керек.
Чылым, кальян, насвайга уруксат берилбейт. Мындай учурда адамдын оозу ачылып калат. Орозо бир чети ушул сыяктуу жаман адаттардан арылтууга да жардам берет.
Ооз толтура кусканга болбойт. Мындай учурда ал адамдын оозу ачылды деп эсептелип калат. Ал эми денеден, ооздон кан же ириң чыкса ооз ачылбайт.
Ушак айтып, жаңжалдашып, урушпаш керек. Орозо бир гана ашказандыкы эмес. Тилдин, көздүн, кулактын да орозосу болот. Бул ушак сөздөн, бирөөнү жамандоодон, урушуп, жаңжалдашуудан арылуу деген маанинин туюндурат. Ошондой эле орозо кармаган адам сөгүнүп, адам көңүлүн калтырган жаман сөз да айтуудан алыс болушу керек.
Кулакка, мурунга суу киргизгенге болбойт. Орозо айы жай айына туш келип калгандыктан, адам катуу ысып, оор жумуштарда иштесе сууга түшүп, жуунууга уруксат берилген. Бирок кулак менен мурунга суу киргизбеш керек.
Оозду атайылап бекитпей уктап калганга болбойт. Колдон келсе саарлыкка туруп, жакшы ниет, тилектер менен ооз жабуу зарыл.
Тиш паста пайдаланганга болбойт. Ооз бек учурда тиш паста эмес, мисвак (атайын дарактан тиш тазалоо үчүн алынган бутак — ред.) менен тазалаш керек. Бирок пастасы жок тиш щетка менен тазалоого уруксат. Тиш пастаны оозду жабаарда же ачкандан кийин колдонсоңуз болот.
Кайсы убакта ооз ачып, кайсы маалда ооз бекитүү керектигин Sputnik Кыргызстан агенттиги даярдаган календардан көрүңүз>>
