Ош: ефрейтордун өлүмүнө шектелген жоокер 10 жылга кесилди

БИШКЕК, 22-май — Sputnik. Ош шаарындагы аскер бөлүктөгү ефрейтордун өлүмүнө шектүү жоокер 10 жылга эркинен ажыратылды, бирок маркумдун туугандары буга нааразы. Мындай маалыматты жабырлануучу тараптын жактоочусу Муса Алыкулов аймактык кабарчыга билдирди.

Эске сала кетсек, окуя өткөн жылдын 6-сентябрында калаадагы №01525 аскер бөлүгүндө болгон. Келишимдин негизинде кызмат өтөп жаткан 22 жаштагы ефрейтор Эламан Ташбалта уулу менен катардагы жоокер Бекболот Заирбек уулунун ортосунда чыр чыгып, ал мушташка айланган. Анын кесепетинен башынан алган жараатынан улам ефрейтор Эламан Ташбалта уулу каза болгон. Бул фактынын негизинде катардагы жоокер Бекболот Заирбек уулуна карата Кылмыш жаза кодексинин 104-беренеси боюнча кылмыш иши козголгон.

"Ош шаардык сотунун чечими менен №01525 аскер бөлүгүнүн жоокери Бекболот Заирбек уулу 10 жылга эркинен ажыратылды. Жаза мөөнөтүн күчөтүлгөн тартипте өтөө каралып, ал Оштогу 25-абакта кармалууда. Жабырланган тарап соттун чечимине алгач макул болушкан. Бирок соттолуучу тараптын жакындары менен жактоочусу "соттолуучу Бекболот Заирбек уулунун Эламан Ташбалта уулунун өлүмүнө тиешеси жок" деп облустук сотко апелляциялык арыз жазышкан.

Алыкуловдун айтымында, алардын арызынан соң жабырлануучу тарап соттолучуну 10 жылга эмес, Кылмыш жаза кодексинин 104-беренесинин 4-бөлүмү боюнча 15 жылга эркинен ажыратууну суранып облустук сотко кайрылган.

"Эки тараптын тең арызын облустук сот 25-майда карап чечим чыгарат", — дейт жактоочу Алыкулов.

Ал ефрейтор Эламан Ташбалта уулунун өлүмү боюнча аталган аскер бөлүмүнүн айрым кызматкерлерине карата да кылмыш иши козголуп, териштирүү иштери уланып жатканын кошумчалады.