БИШКЕК, 17-май — Sputnik. №35 багыты менен жүргөн жаңы автобустарда пенсионерлер үчүн жеңилдик каралбаганын Sputnik Кыргызстан агенттигине шаардык мэриянын маалымат кызматы билдирди.
Өткөн жумада жеке компания Кытайдан Hengtong үлгүсүндөгү 12 жаңы автобусту алып келген. Анда киши отура турчу 80 орун бар жана газ менен жүрөт. Ошондой эле майыптарды ташууга дагы ыңгайлашып, видеокамералар орнотулган.
Буга чейин социалдык тармактарда айрым колдонуучулар автобустун ичинде "Жеңилдик жок" деген жазуулар бар экенин айтып, нааразычылыгын билдиришкен.
Бишкек шаарынын мэриясы жаңы автобустар муниципалдык транспорттордун катарына кирбей турганын, ал жеке компанияга таандык экенин маалымдап, анда жеңилдик каралбаганын баса белгиледи. Буга байланыштуу пенсионерлер дагы башка жарандардай эле жол киреге 8 сомдон төлөшөт.
Мэрия мындай теңсиздикти жокко чыгаруу үчүн шаардык кеңешке сунуш киргизүүгө ниеттенүүдө.
