БИШКЕК, 17-май — Sputnik. Эмеректерди химиялык тазалоо боюнча тендер жарыялоодо ката кеткенин өкмөттүн маалымат кызматы билдирди.
Буга чейин мамлекеттик сатып алуулар боюнча порталына президент менен өкмөттүн иш башкармалыгы эмеректерди жаныбарлар булгагандыктан химиялык тазалоодон өткөрөт деген жарыя чыккан.
Өкмөттөн билдиришкендей, аталган жарыяны порталга чыгарууда химиялык тазалоонун түрү деген бөлүмдө байкабастыктан улам "жаныбарлардын издери, жүндөрү" деген категория дагы тандалып калган.
"Бул ката адамдык фактор менен байланыштуу. Президенттин жана өкмөттүн иш башкармалыгы жумшак эмеректерди химиялык тазалоо боюнча тендер жарыялаган, бирок бул жерде эмеректерди жаныбарлардын издеринен жана жүндөрүнөн тазалоо деген болгон эмес", — деп айтылат маалыматта.
Өкмөттөн тийиштүү кызматкерлер менен мындай алашемдикке кийин дагы жол бербөө максатында түшүндүрүү иштери жүргүзүлгөнүн баса белгилешти.
