БИШКЕК, 14-май — Sputnik. Кытай жаңы Жибек Жолун курууга катышкан өнүгүп келе жаткан мамлекеттерге жакынкы үч жылда жардам катары 60 миллиард юань (8,7 миллиард доллар) бөлөт. Бул тууралуу Кытай Эл Республикасынын төрагасы Си Цзиньпин "Бир алкак — бир жол" эл аралык кызматташуу форумунда билдиргенин РИА Новости агенттиги жазды.
"Кытай "Бир алкак — бир жол" стратегиясын ишке ашырууга катышкан өнүгүп келе жаткан мамлекеттерге жана эл аралык уюмдарга жардам катары 60 миллиард юань бөлүп, көптөгөн жарандык объектилерди курат", — деп Кытайдын лидери баса белгиледи.
2013-жылы Кытай "Бир алкак — бир жол" экономикалык өнүгүү стратегиясын жарыялаган. Ал Евразия мамлекеттери менен кызматташтыкты арттырууга багытталган. Стратегия өнүгүүнүн эки негизги багытын өзүнө камтыйт. Алар: Жибек Жолунун экономикалык алкагы жана деңиз Жибек Жолу. Бул аракеттердин бардыгы чыгыштан батышка жеңилдетилген шартта товар жеткирүүдө соода коридорун түзүүгө багытталган.
