БИШКЕК, 6-май. — Sputnik. Тышкы иштер министри Эрлан Абдылдаевдин Кытайдагы расмий иш сапарында тараптар ортосунда кытай визасын алуу маселеси талкууланды. Бул тууралуу ТИМ маалымат кызматы кабарлады.
Белгилүү болгондой, ата мекендик ишкерлер Кытайга виза алуу кыйынчылыкка туруп жатканын айтып нааразы болушкан.
Абдылдаев кесиптеши Ван И менен бир катар маселелер боюнча сүйлөшүп, анын ичинен терроризм жана экстремизм менен күрөшүү маселесине кеңири токтолушкан.
"Мындан сырткары, тараптар кыргыз жарандарынын виза алуу маселесин талкуулап, кыргызстандык жүк ташуучулардын көйгөйлөрү тууралуу баарлашты", — деп жазылат маалыматта.
Сүйлөшүүлөрдүн жыйынтыгында эки өлкөнүн тышкы иштер министрлери 2018-2019-жылдардагы эки министрликтин кызматташуусу боюнча документке кол коюшту.
Муну менен катар иш сапар учурунда Абдылдаевге Кытай ТИМинин дипломатиялык академиясынын ардактуу профессору деген наам ыйгарылды.
