БИШКЕК, 11-май — Sputnik. Кыргызстандыктар өздөрүнүн катталган дарегин электрондук кызмат көрсөтүү порталынан e.srs.kg биле алышат. Бул тууралуу Мамлекеттик каттоо кызматынан билдиришти.
Мындай мүмкүнчүлүк 1-майдан тарта жарандарга жаңы паспорт берүү жана документтерди кабыл алуу аракеттеринин башталышы менен пайда болду.
Паспортту алууда жарандын каттоосу Мамлекеттик каттоо кызматынын маалымат базасында милдеттүү түрдө болушу керек. Ушундай болгон учурда гана электрондук анкетаны толтурууда эч кандай документтердин көчүрмөлөрү талап кылынбайт.
Ошондой эле жарандар Мамкаттоонун маалыматтык базасында бар-жогун алдын ала биле алышат.
Каттооңузду кантип текшере аласыз:
- e.srs.kg парталына киресиз
- Башкы беттеги "Документтерди текшерүү" бөлүмүнөн "Катталган даректи текшерүү" дегенди тандайсыз
- "ПИН" деген жерди толтуруп, "Мен робот эмесмин" деген жерди белгилейсиз
- Каттоо жок болгон учурда Элге кызмат көрсөтүү борборуна (ЦОН) же даректи каттоочу паспорт столуна кайрылуу керек.
