БИШКЕК, 11-май — Sputnik. Улуттук коопсуздук комитети "Кыргызстан" фракциясынан депутат Канат Исаевге айыбын угузду.
Депутатка карата мурда козголгон кылмыш ишинин алкагында "коррупция" беренеси боюнча айыбы угузулуп, сыртка чыкпоо боюнча тил каттын негизинде үй камагына алынды.
УКМКдан кабарлашкандай, Канат Исаев Токмоктун мэри болуп турганда муниципалдык жер участогун жеке компанияга соода борборун куруу үчүн берген деп айыпталууда. Ал ошондой эле мэриядагы жооптуу кызматтарды ээлеген адамдар менен сүйлөшүп алып, шаардык бюджеттен каржыланчу автобекеттин курулуш ишин өзүнө караштуу ишканага берген деп айыпталууда.
