БАТКЕН, 2-май. — Sputnik. Баткен шаарынын Чет-Булак кварталынын жаңы конушунун тургундары суу жоктугунан кудук казууга мажбур болууда. Бул тууралуу аймактык кабарчыга жаңы конуштун тургуну Абдырахман Исламбеков билдирди.
Маалыматка ылайык, жаңы конуштун тургундары бир канча жылдан бери суу жок жашап келишет.
Жаңы конуш Баткен калаасынын жогору жагында тургандыктан, жери таштак келип, суу чыгаруу үчүн 20 метрден 40 метр тереңдикке чейин казуу керек. Кудук казуучулар анын бир метрин миң сомдон төрт миңге чейин казышат. Кудуктан суу чыгарууга 200 миң сомго чейин каражат жумшаларын Исламбеков кошумчалады.
"Кудуктун суусун ичкенге болбойт, аны курулушка жана сугатка пайдаланабыз", — дейт Исламбеков.
Жаңы конуштун дагы бир тургуну Каныбек Мундузовдун айтымында, жаз келгенден баштап жаңы конушта курулуш жанданып, суу көп талап кылынат.
"Жаз келгенден тарта, суу көбүрөөк колдонулуп, бир тоннасын 600 сомдон сатып алууга туура келет", — деди ал.
Чет-Булак кварталындагы жаңы конушта учурда 100дөн ашуун адам жашайт.
