БИШКЕК, 1-май. — Sputnik. Аюу айылында жер көчкү алдында калгандарды издөө иштери башталды.
Бүгүн издөө аракеттери 07.45те башталып ӨКМден Республикалык өзүнчө куткаруу отрядынан 110, облустук өрткө каршы куткаруу кызматынан 40, Ош шаардык өрткө каршы башкармалыгынан 40 куткаруучу, ИИМдин 50 кызматкери, Жалал-Абад облусунун аскер бөлүгүнөн 50, Ош шаарынын аскер бөлүгүнөн 50 жоокер, мындан сырткары жергиликтүү тургундардан 40 адам издөө иштерине катышууда. Жалпысынан 380 адам тартылган.
Адистердин айтымында, көчкүнүн бийиктиги болжол менен 4,5-5 метрди түзөт.
Кечээ түш ченде 12 жана 2 жаштагы эки кыздын, кечке маал 20 жаштагы дагы бир кыздын сөөгү табылган.
Аюу айылы Өзгөндүн борборунан 30 чакырым алыстыкта жайгашкан. Аталган аймакта 248 үй-бүлө, ал эми киши саны менен алганда 1800гө чукул адам жашайт.
