Журналист Гүлдана Талантбекова доула кызматын аркалаган Жамиля Уметалиеваны кепке тартып, бул кесип тууралуу кененирээк билип көрдү.
— Жамиля, алгач доула кызматы тууралуу айтып берсеңиз?
— Доула бул — жардамчы дегенди билдирет. Биз кош бойлуу аялдарга, төрөт убагында жана төрөттөн кийин эмоционалдык, психологиялык жактан жардам көрсөтөбүз. Доула кызматы бизге Батыштан келди. Ал жакта пайда болгонуна деле он жылдын жүзү болуптур.
Бирок доуланын өзөгү кыргыздарда калыптанган. Боюнда бар келиндерге, алардын төрөтүнө илгертеден эле апалар, эже-сиңдилер түрдүү кызматтарды көрсөтүп келишкен. Унутулуп калган нерсе убакыттын өтүшү менен кайра келет деген түшүнүк бар.
— Доула аялдарга кандай багытта жардам көрсөтө алат?
— Көбү доуланы акушердин кызматы менен чаташтырып алат. Бизде атайын медициналык билим жок. Тагыраагы, диагноз коюп, дары жазып бере албайбыз. Кош бойлуу айымдарга психологиялык жактан жардам көрсөтөбүз, массаж жасайбыз, дем алуусуна көмөктөшүп, маалымат жактан колдоо көрсөтөбүз. Кандай гана учур болбосун, туура чечим кабыл алууга жардам беребиз, бирок жеке оюбузду таңуулабайбыз.
— Бир тууган сиңдимдин төрөтүнө катышкам. Ошондо кош бойлуу аялдарга моралдык жактан колдоо, жардам зарыл экенин түшүндүм. Анан бул кесипке кызыгып интернеттен маалыматтарды издей баштадым. Орусияда атайын доулалардын ассоциациясынын төрт айлык онлайн курсун окудум. Окуунун 70 пайызы психологиялык жардам, калган бөлүгүн гинекологиялык негиздер түздү.
— Өзүңүз да доуланын кызматын пайдаланып көрдүңүз беле?
— Жашым 35те, үч баланын энесимин. Эки баламды төрөгөндө жолдошум төрөткө катышкан эле. Ал эми кичүү кызыма 6 ай болду, аны төрөгөндө кесиптешим Ксения Литвинова коштоп кирген.
— Кыргызстанда доула кызматына суроо-талап кандай?
— Силерди төрөт үйүнүн дарыгерлери кандай кабыл алат?
— Бизде негизи өнөктөш менен көз жарууга уруксат берилген. Төрөтканага барганда доуламын дебей эле, кош бойлуунун сиңдиси же досумун деп айтабыз.
— Акысы канча турат?
— Бишкекте доула кызматын көрсөткөн төрт кыз болуп кызматтын баасын 10 миң сомдун тегереги деп сүйлөшкөнбүз. Бул баага ар бир кардарга индивидуалдык мамиле көрсөтүлөт.
— Силерде иш графиги кандай?
— Кош бойлуунун каалоосуна жараша. Төрөткөнгө чейин жолугушуулар болуп турат. Адатта толгоосу башталганга чукул барабыз. Мен эки аялды төрөтүп, 4-5 саат жүргөм. Экөөнүн тең биринчи төрөтү экен. Кээде биздин кыздар суткалап жүрөт.
— Алдыда кандай пландарыңар бар?
— Доула кызматын аркалаган кыздар болуп атайын борбор ачалы деген ой-максаттарыбыз бар. Ал жакта атайын кызыккандарга доула кесибин үйрөтүп, элге жайылталы деп ойлоп жүрөбүз.
