БИШКЕК, 22-апр. — Sputnik. Унаа коюп кеткен эки окуучунун абалы дагы деле оор бойдон калууда. Бул тууралуу Sputnik Кыргызстан агенттигине Саламаттыкты сактоо министрлигинин маалымат катчысы Жылдыз Айгерчинова билдирди.
22 Чын Куран 2017, 01:35
21-апрель күнү Бакаев менен Ремесленная көчөлөрүнүн кесилишинен Mercedes-Benz С-class үлгүсүндөгү унаа №74 мектептин 3-классынын эки окуучусун сүзүп, экөө тең оор абалда ооруканага түшкөн.
Ал эми 22-апрелге караган түнү балдардын бири өзүнө келген.
Айгерчинованын айтымында, бүгүн эртең менен дарыгерлер консилиум өткөрүштү.
"Дарыгерлер консилиумга чогулушту. Бүгүн балдар магниттик-резонанстык-томографияга тартылат", — деди маалымат катчы.
Саламаттыкты сактоо министрлигинен мурдараак билдиришкендей, кырсыкка кабылган он жаштагы баланын башы, ички органдары жаракат алып, сол ийни сынган. Ал эми экинчи өспүрүмдүн башы жана ички органдарынан сырткары, эки тизеси, омурткасынын жогору жагы сынып кеткен.
Ал эми окуучулар жабыркаган окуяга күнөөлүү деп шектелип, борбор калаанын 29 жаштагы жараны кармалган.
Шектелүүчү окуя болгон жерден коркуп кеткени үчүн качканын айтып берген.
