Адамды бир күндө өзгөртүү мүмкүн эмес, бирок ошол өзгөрүүлөргө жол ачкан ойлорду өзгөртсө болот. Андыктан жакшы ойлор менен өткөн күнгө саресеп салалы.
Кыргызстандагы эң чоң жылкыны көрдүңүз беле? Мен дагы көргөн эмесмин. Келиңиз, чогуу көрөлү. Миллион долларга бааланган жылкыга суктанып бүтпөйсүң.
Жылкы демекчи, Ашхабад шаарында ахалтекин жылкылары арасында эл аралык "сулуулук" сынагы өтөт экен. Мында калыстар тобуна окумуштуулар, саяпкерлер кирген. Жылкы жаныбарына өзгөчө көңүл бурган Гурбангулы Бердымухамедов мырзага баракелде дейли.
Таржымалы бүтпөгөн терроризм. Кечээ күнү Москвада Аброр Азимовдун бир тууганы Акрам Азимовду камакка алуу боюнча сот болуп өттү. Анда айтылган маалыматтарга ылайык, Акрам террористтик уюмдар менен байланышта болуп, аларга көмөктөшүп келген имиш.
Ал эми аталган бир туугандардын энеси балдарынын кылмыш жасагандыгына ишенбей тургандыгын жар салды.
Боздогон эненин арманы, ыйы кимге? Шектүүлөр террористтер менен байланышка чыкканда байкуш энесин ойлошту бекен? Башкысы башка балдарда ушул үй-бүлөдөн сабак алса.
Террорчулукка жол жок! Ош облусунун Кара-Суу шаарындагы жаштар экстремизим, терроризмге каршы жөө жүрүш жасашты.
Окуучулардын бири-бири менен бычакташып, келечегине балта чапкандан көрө ушундай акцияларга катышканы дурус эмеспи.
Валюта наркы. Бүгүн сомдун баасы долларга карата орто эсеп менен 67.12 (сатып алуу) жана 67.58 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.00 сом, Аи-95 үлгүсүндөгү бензин 40.70 сом, ал эми дизель майы 35.50 сомдон сатылууда.
Соңку сөз. Алыска кетчү жол бир кадамдан башталат.
Жакшылык тилеп Исмаил Мамытов
