БИШКЕК, 7-апр. — Sputnik. Борбордогу №3 балдар ооруканасынын алдында сабалган КТРКнын журналисти Алымбек Адылбековдун иши иликтенип жатат. Бул туурасында Бишкек ШИИБ билдирди.
Маалыматка ылайык, ал жакындары менен 5-апрель күнү №3 балдар ооруканасында жаткан тууганын абалын суроо үчүн барганда аларды киргизбей койгон. Сыртта күтүп турганда ары жакта турган бала сөгүнүп-сагынып журналисттин дарегине жаман сөздөрдү айтып, ортодо жаңжал чыккан да Алымбековду бет талаштыра коюп жиберген. Окуя болгондон кийин ал кайра бир топ балдарды ээрчитип келип жабырлануучу менен кошо турган туугандарын да көптөп сабап кетишкен.
Бул окуяга шектелип Октябрь РИИБ тарабынан 17 жаштагы сегиз өспүрүм бала кармалган. Аларга карата тергөө амалдары жүргүзүлүп, ата-энесинин жоопкерчилиги менен коё берилген.
Ошондой эле буга чейин айрым жалпыга маалымдоо каражаттарында тергөө иштерине кысым болуп жатат деген маалымат чындыкка дал келбей турганын айтып, бул ишти Бишкек ШИИБи өз көзөмөлүнө аларын убадалады.
Учурда соттук медициналык экспертиза түзүлүп, иликтөө иштери уланып жатат.
