БИШКЕК, 3-апр. — Sputnik. Чүй облусунун Жайыл районунда 3-апрелде түнкү саат саат 2:50 чамасында Бишкек — Ош унаа жолунун 209-чакырымында токтоп турган DAF Trucks үлгүсүндөгү жүк ташуучу унааны Honda Odyssey машинасы сүзүп, алдына кирип кеткен. Бул тууралуу ӨКМдин маалымат кызматы билдирди.
Жол кырсыктын кесепетинен Honda Odyssey унаасынан эки киши каза болуп, бир адам оор, төрт адам жеңил жаракат алган.
"Кырсык болгон жерге куткаруучулар барып, оор абалдагы бир адамды унаадан чыгарып, Токтогул райондук Тез жардам кызматынын унаасына салып беришкен. Каза болгон эки адамды Жайыл райондук Кайгуул милициясына өткөрүп беришкен", — деп айтылат маалыматта.
Калган төрт адам жолдо бараткан башка автоунаалар менен Жайыл райондук ооруканага алып келинген.
Жүк ташуучу унаадан эч ким жабыркаган эмес.
