БИШКЕК, 1-апр. — Sputnik. 2-апрелде айрым жерлерде жаан карга айланып, тоолордо кар жаашы мүмкүн. Бул тууралуу Кыргызгидромет билдирди.
Зымдарга жана бактарга суу кар жармашат. Тоолуу райондордо жана тоо этектеринде жолдор тайгак жана тоңголок болуп, кар күрткүсү пайда болот.
Батыштан соккон шамалдын ылдамдыгы секундасына 17-22 метрге жетет.
Чүй, Талас өрөөндөрүндө 5 градус суукка жеткен үшүк жүрөт. Ал эми Ош, Жалал-Абад, Баткен облустарынын дыйканчылык аймактарында 4…9 градус жылуу болот.
Ысык-Көл ойдуңунда 5 градус жылуу, Нарын облусунда болсо 6 градус суук болот.
Кыргызгидромет мындай үшүктүн жүрүшү бүчүр байлаган мөмө бактарына коркунуч жаратарын эскертет.
