БИШКЕК, 30-мар. — Sputnik. КР Өзгөчө кырдаалдар министрлигинин атайын эсебине Түркиянын ACT Airlines компаниясы 600 миң доллар которду. Бул тууралуу өкмөттүн маалымат кызматы билдирди.
Маалыматка ылайык, биринчи вице-премьер Мухамметкалый Абулгазиев аталган компаниянын өкүлдөрү менен жолуккан.
"ӨКМдин атайын эсебине которулган каражат өкмөттүк комиссиянын келтирилген материалдык чыгымды төлөө үчүн сураган суммасынын бир бөлүгү. Келтирилген чыгым 195 миллион сом деп бааланган. Келип түшкөн биринчи транш Түркия тараптын керектүү төлөмөдөрдү төлөп берүүгө даярдыгын айгинелейт. Биз алардын бул маселенин тез аранын ичинде адилеттүү чечилишине кызыкдар экенин көрүп жатабыз", — деди ал.
Абулгазиев ошондой эле Түркия тараптан суралган каражат толугу менен келип түшкөндөн кийин авиакырсыктан жабыркагандарга бөлүп берилерин баса белгиледи. Андан сырткары, эл аралык нормаларга ылайык каза тапкандардын жакындарына жөлөк пулду дагы төлөтүп берүүгө аракеттер көрүлүп жатканын кошумчалады.
Андан сырткары, кырсыктан түрдүү жаракаттарды алгандарга да жөлөк пул төлөө жагы Түркия тарап менен талкууланган.
Эске салсак, 16-январда "Манас" аэропортуна жакын жердеги Дача айылына Түркиянын ACT Airlines компаниясына таандык жүк ташуучу Boeing 747 учагы кулап, 39 киши каза болгон. Окуянын чоо-жайын мамлекеттер аралык авиациялык комитети иликтөөдө.
