БИШКЕК, 28-мар. — Sputnik. Facebook социалдык тармагын кыргызчалоо ишинин 63 пайызы аяктаганын ыктыярчылардын бири Кайрат Замирбеков Sputnik Кыргызстан агенттигине билдирди.
Анын айтымында, интернет колдонуучулар арасындагы эң популярдуу болгон социалдык тармактын интерфейсин кыргызчалоо иштери былтыр июнь айында башталган.
"Facebook тармагын кыргызчалоо боюнча атайын ыктыярчылардын тайпасында 300дөн ашык киши бар. Алардын арасында тарыхчылар, мугалимдер, программисттер жана башка тармактын адистерин кездештирүүгө болот. Андыктан бир терминди которгондо кеңешип туруп, сунушталган варианттардын бирине токтолобуз", — деди ал.
Замирбеков өз сөзүндө негизинен техникалык терминдерди которууда бир аз оорчулуктар бар экенин кошумчалады.
Кайрат мындан эки жыл мурун Кыргыз улуттук университетин аяктап, коомдук фонддордун биринде эмгектенет.
Учурда Facebook социалдык тармагын Орто Азия мамлекеттеринен казак, тажик жана өзбек тилдерине которулуп жатканын сайттан көрүүгө болот. Негизинен Facebook социалдык тармагынын интерфейси отуздан ашык тилге которулган.
Белгилей кетсек, былтыр февраль айында кыргыз тили Google Translate тутумуна киргизилген болчу.
