БИШКЕК, 11-март. — Sputnik. Өлкөдөгү эркиндик үчүн күрөшкөндөрдүн атын жамынып алып ар кандай иштерди жасап жаткандарга мыйзам эл тарабынан шайланган президентке эле эмес, баарына бирдей экенин эскертүүгө убакыт келип жетти. Бул туурасында өлкө башчы Алмазбек Атамбаев өз кайрылуусунда билдирген.
Мындан сырткары, Атамбаев журналисттер бирөөнү ушактап, жалган жалаа жабуу эмес, элге ачык-айкын маалыматтарды жеткирип турууга милдеттүү экенин баса белгиледи.
"Көз карандысыз журналистер, айрым ЖМК менен саясатчылардын негизги максаты акыйкатка жетүү эмес, алар эл шайлаган мамлекет башчыга жалаа жаап, ар кандай ушактарды таратуу менен кырдаалды курчутуп, алдыдагы президенттик шайлоого катышууну көздөп жатканын кыргыз эли түшүнүшү керек", — деди өлкө башчы.
Президент Кыргызстан соңку жылдары бутуна туруп келе жатканын белгилеп, ал эми сөз болуп жаткандар ушак менен жалааны негизги курал катары тандап, ыплас иштерди жасап жатканын айтат.
"Тийиштүү органдар менен чындык үчүн күрөшүүгө убакыт келип жетти. Мыйзам эл тарабынан шайланган өлкөнүн президентине эле эмес, баарына бирдей болууга тийиш экенин билиши керек", — деди Атамбаев.
Буга чейин президенттин ар намысын коргогон башкы прокурор Индира Жолдубаева "Ата Мекен" фракциясынын лидери Өмүрбек Текебаевдин адвокаттарын жана Zanoza менен "Азаттык" маалымат сайттарынын үстүнөн миллиондорду чапчыган эки арыз жазган.
