БИШКЕК, 6-мар. — Spuntik. Табарсыгы сыртында болуп төрөлгөн Жантайдын үй-бүлөсү ымыркайды тамактандыруу үчүн акча жагынан кыйналып жатканын анын апасы Азима Шляермахер Sputnik Кыргызстан агенттигине билдирди.
Азима Шляермахердин айтымында, жардам берүүнү каалагандар үчүн банктан атайын эсеп ачылган, бирок чогулган сумма аз болуп жатат.
"Азыр эң башкысы акча топтош керек. Биз ар бир тыйындан бери эсептеп, үнөмдөп жатабыз. Жантай бир түрдөгү гана ымыркайдын тамагын жеп жатат. Башкасын жесе аллергия болууда. Азыр акча тартыш болуп, компьютерден баштап бардык буюмдарды саттык. Көңүлкош карабаган жарандардан жардам сурайбыз", — деди ал.
Жантайга дагы бир нече жолу операция жасалышы керек. Москвадагы биринчи операция быйыл жайында же күзүндө болушу пландалууда.
