БИШКЕК, 6-мар. — Sputnik. Россиянын "Живая планета" телеканалы Кыргызстан тууралуу толук метраждуу тасманын экинчи бөлүгүн сунуштады.
Мындан бир жума мурун өлкө тууралуу фильмдин биринчи сериясы көрсөтүлүп, анда Кыргызстандын ажайып кооздугу менен элдин каада-салты тууралуу айтылат.
Даректүү тасманын экинчи сериясында каналдын алып баруучусу Константин Бышевой Кыргызстандын биологиялык ар түрдүүлүгүн чагылдырууга аракет кылат.
"Кыргызстан чындап эле ажайып өлкө. Франциянын Альп тоолорун, Италиянын Доломитин, керек болсо өзүмдүн Уралымдын элесин көрдүм", — дейт Бышевой.
"Кыргызстандын символу болуп Тянь-Шань карагайы эсептелет өңдүү. Климаттын оордугуна карабай асманга бой керип, көз жоосун алып турат", — деп тасманы жыйынтыктайт.
Даректүү тасма былтыр май айында тартылган.
