БИШКЕК, 2-мар. — Sputnik. Саякатчы Тимур Тугалев менен италиялык блоггер Сара Иззи тарабынан тартылган Кыргызстан тууралуу "Lost in Kyrgyzstan" аттуу ролик National Geographic журналы жарыялаган Travel Photography сынагынын жеңүүчүсү болду. Бул тууралуу Sputnik Кыргызстан агенттигине видеонун режиссеру өзү билдирди.
Кыргызстан тууралуу 4К-форматында тартылган ажайып ролик былтыркы жылдын октябрь айында көпчүлүктүн назарына тартууланган. Эки мүнөттүк видео жайында Ысык-Көл менен Соң-Көлдүн жээгинде, Орто-Токой суу сактагычында тартылган. Кийинчерээк ролик "National Geographic Россия" журналынын сайтына коюлган.
Сынактын жеңүүчүлөрү 28-февраль күнү Лондондо өткөн National Geographic көргөзмөсүндө айтылды. Бул роликтен тышкары, баш байгеге Мэтт Жарвистин жаныбарлар дүйнөсү тууралуу жана Сэм Хипвеллдин Түштүк-Чыгыш Азия элдеринин жан-жаныбарлары жөнүндө тартылган эмгектери ат салышты.
"Сара экөөбүздүн ишибиз жеңишке жеткенине ушу кезге чейин ишене албай турам. Сыйлык тапшыруу аземинде көпчүлүк Кыргызстандын ажайып жаратылышы тууралуу айтып жатышты. Биз максатыбызга жеттик деп ойлойм", — деди Тугалев.
Ролик жарыяланары менен тез аранын ичинде жайылып, Россия, Греция, Испания жана АКШнын ресурстарына жайгаштырылган.
