БИШКЕК, 5-мар. — Sputnik. Түркиянын Кайсери шаарында окуган ар улуттагы студенттерге ак калпак кийип, кыргыз туусун желбиретип Ак калпак күнүн белгилешти. Бул тууралуу "Кыргызстандык студенттер биримдигинин" жетекчиси Манасбек Максутов билдирди.
Бул иш-чара Ак калпак күнүнө карата кечээ 4-мартта өткөрүлгөн.
"Кыргызстанды таанытуу жана улуттук кийимдерди даңазалап көрсөтүү максатында ушул иш-чараны уюштурдук. Мунун алкагында ар кайсы өлкөлөрдөн келип окуп жүргөн Кайсери шаарындагы 35 студентке ак калпак кийгиздик. Алар кубануу менен кабыл алып, кыргыз тилинде майрамыбыз менен куттукташты", — деди Максутов.
Ал билдиргендей, Түркиянын Кайсери шаарында 100дөн ашуун кыргызстандык бар. Алардын 12си лицейде, 75и университетте окуса, 15и ар кандай жумуштарда иштейт.
Эскерте кетсек, Ак калпак күнү Кыргызстанда 2011-жылдан бери жыл сайын 5-мартта белгиленип келет.
Былтыр Маданият министрлиги бул күндү расмий белгилөөнү сунуштап, Жогорку Кеңеш 5-мартты Ак калпак жана улуттук кийимдер күнү деп белгилөө жөнүндө токтом кабыл алган.
