БИШКЕК, 28-фев. — Sputnik. Бүгүн Кара-Суу районунун Шарк айыл өкмөт башчысын шайлоо үчүнчү ирет өткөрүлдү. Бул туурасында Sputnik Кыргызстан агенттигине Кара-Суу райондук шайлоо комиссиясынын төрагасы Назарбек Султанов билдирди.
Анын айтымында, бүгүнкү шайлоого 31 депутат толук келип катышкан.
"Айыл өкмөт башчылыгана 7 талапкер ат салышып, натыйжада Таалай Тезекбаев 21 добуш менен жеңишке жетишти. Ал эми биринчи турдагы шайлоодо талапкерлер Арстан Жолдошев менен Раим Калматовго ишеним көрсөтүлгөн жок деп табылып, кийинки турга катыша албай калышкан", — деди Султанов.
Эскерте кетсек, буга чейин 31-январда шайлоо өтүп талапкерлер тиешелүү санда добуш ала алган эмес. Экинчи тур 16-февралга белгиленип, анда төрага баш болгон 11 депутат 10 күнгө дайынсыз жоголуп кетип, дагы үч депутат ар кандай себептер менен келбей койгон. Мындан улам 31 депутаттын 17си гана катышкандыктан кворум болбой калган.
Шарк айыл өкмөт башчылыгына жаңыдан дайындалган Таалай Тезекбаев 1967-жылы Кара-Суу районун Маданият айылында туулган. Красноярскидеги Агрардык университетти аяктаган. Буга чейин Алай райондук Экономикалык кылмыштарга каршы күрөшүү кызматында иштеген. Ушул эле айыл округда 2010-2011-жылдары айыл өкмөт башчынын орун басары, 2011-2012 жылдары кирешелер бөлүм башчысы, 2012-жылдын май айынан бери башкы жер адиси болуп эмгектенип келген.
